الصحة النفسية مش رفاهية، هي أساس كل شيء
من وقت طويل وأنا مؤمنة إن الإنسان يستحق يعيش بسلام داخلي، بعيد عن التراكمات اللي بتخنقه، والمشاعر اللي ما بلاقي إلها مكان. لهذا السبب اخترت أكون أخصائية نفسية.
اهتمامي بالصحة النفسية ما إجا من فراغ، بل من شغف حقيقي بفهم النفس الإنسانية، وسماع القصص، ومرافقة الناس بخطواتهم الأولى نحو التغيير، الشفاء، أو حتى التصالح مع الذات.
في جلساتي، بحاول أخلق مساحة آمنة، خالية من الأحكام، بيسمح فيها الشخص يكون “هو” بدون أقنعة، ونتعامل سوا مع الألم، الأسئلة، الخوف، وحتى الأمل.
الصحة النفسية مش بس عن علاج اضطراب معين، هي عن كيف نحيا، كيف نتعامل مع مشاعرنا، علاقاتنا، وكيف نحس بقيمتنا حتى بوسط العتمة.
ومن خلال هاي الصفحة، رح أشارك أفكار، أدوات، ومواضيع بتلامسنا جميعاً… لأننا كلنا بنمر بأوقات ضعف، وكلنا منستحق الدعم.
إذا كنت/ـي بتمر/ي بتجربة صعبة، أو حتى بس بدك تحكي… أنت مش لحالك
كتبت بواسطة الاخصائية: نور محمد عويص
تم الإنشاء في: 4/7/2025
آخر تحديث في: 4/8/2025